Sugilanon: Kaluhang kalampusan

ALAS siyete sa gabii nagkapuliki si Ramil pagpanghipos sa iyang mga sinina ug uban pang kagamitan. Usa ka oras na lang ug molarga na ang barko nga mao unyay iyang sakyan paingon sa Mindanao. Mopauli siya sa siyudad sa Cagayan de Oro nga maoy iyang yutang natawhan tungod kay nabatyagan niya nga pulos na lang demalas ang iyang nahiaguman dinhi sa Sugbo.

“Di ba may gi-aplayan ka man nga laing kompaniya ug gipahuwat ka na lang sa ilang tawag?” sukot ni Albert nga iyang igsuon kinsa gibati og kahingawa. Mao man goy gusto ni Albert nga anhi na sa Cebu mopuyo si Ramil. Pinangga niya si Ramil kay duha ra silang managsuon. Gigastuhan ni Albert si Ramil sa pagtungha niini sa kolehiyo hangtod nga nakatapos na kini sa kursong Aircraft Maintenance Engineering. Nia na sa Cebu manimuyo si Albert kay nakaasawa man siya og taga Cebu ug dinhi usab siya magtrabaho.

“Di ko na lang paabuton ang ilang tawag, Noy Albert, kay basin og sama ra gihapon sa uban nakong gi-aplayan nga nagpaabot lang ko saw ala,” tubag ni Ramil dayong panghupaw. Unya mikisdom ang iyang nawong dihang iyang nahinumdoman ang kapakyasan nga iyang nahiaguman.

Dihang naka-gradwet na siya sa Aircraft Maintenance Engineering, misulay si Ramil pagpangaplay pagka sundalo sa Philippine Air Force kay iya man sa PAF ang tunghaan nga iyang gi-eskuylahan, apan wala siya dawata kay mubo man siyang tawo. Nangaplay sab siya sa nagkalain-laing mga kompaniya sa ayroplano, apan sama sa naandan gisaaran lamang siya nga tawgon, apan wala gayud siya makadawat og tawag. Napun-an pa ang iyang kasubo dihang miapil siya sa dula sa gugma ug wala modaog. Wala siya sugta sa babaye nga alang kaniya mao ang una ug katapusan niyang gugma, si Juvy.

HUMAN sa pipila ka gutlo luwan na si Ramil sad yip pasaheroan. Ning higayuna ang dyip diha na sa halapad nga karsada sa reclamation area ug nagpaingon na sa Pier 4 diin atua ang barko nga iyang sakyan. Namatngunan niyang mikurog ang iyang selpon nga gisuksok niya sa tuong bulsa sa iyang karsones nga maong. Gikuot niya kini ug gibasa ang mensahe nga natala niini, ‘Report for work tomorrow at 0800 Hrs: Philippine Air Lines.”

Nakapahiyom si Ramil. Hilabihan niyang lipaya kay miabot na ang suwerte sa iyang kinabuhi. Gipara dayon niya ang dyip ug human mahatag ang plete, nanaog siya nga nagdala sa iyang traveling bag. Mipara siyag taksi ug nagpahatod balik sa balay sa iyang igsuon.

Samtang nagdagan ang taksi namatngunan na sab ni Ramil nga mikurog na sab ang iyang selpon. Gikuot dayon niya ang selpon ug gibasa ang mensahe. “Gidawat na nako ang imong gugma, Ramil. Aria dayon ko diri sa among balay kay ipaila tika sa akong mga ginikanan ug mga igsuon.—Juvy.”

“Salamat, Diyos ko!” nakatuaw si Ramil sa tumang kalipay. Unya nasigpatan niya diha sa salamin nga nahimutang sa may ulohan sa drayber ang matingad-ong pasiplat sa drayber sa taksi nga iyang gisakyan. (KATAPUSAN)