Angay ba ko mo-surrender sa akong gugma sa akong uyab nga mabdos ron unya wa makadawat sa akong pagkaako ang mga ginikanan? Taga Liloan, Cebu ko, usa ka sikyu sa Mandaue.
Nakauyab ko og usa ka katabang sa balay nga gwapa. Maa-an gani siya nga paryente ra sa iyang amo. Di sad sa panghambog, hitsuraan ko ug taas. Nagkauyab mi ani niya dihang gidala siya sa iyang amo kay kliyente man namo. Naghatagagay mi og numbers hangtud nga niresulta sa relasyon. Nakaadto ko sa ilaha apan bugnaw man og tinagdan ang iyang mga ginikanan nako.
Tinuod maayo ang kahimtang nila sa ilang probinsya. Klaro man sa porma sa ilang balay kay layo ra sa amo nga barongbarong lang. Siguro napugos lang ning akong uyab og trabaho kay na stroke man ang iyang papa. Hangtod nga nisangko na sa pagmabdos sa akong uyab. Apan wa pa makahibawo ang iyang mga ginikanan apan sa dihang nihagad ko og kasal niya, niingon siya nga di mosugot iyang mga ginikanan kay unsa kunoy ikabuhi ug ikatabang nila sa usa ka security guard.
Nahugno ko sa gisulti sa akong uyab kanako ug nakahuna-huna na hinuon ko nga mopalayo niya. Unsay angay nakong buhaton?
JAIME
Jaime,
Normal ra na sa atong mga tawo nga mamili. Masabtan ra na nimo kon makaanak ka, labi na babaye kay maglantaw gyud ka sa kaugmaon niini labi na karon nga way mga klaro ang ubang mga lalake, mobiya lang human momabdos ang babaye. Kini sama karon sa imong nahunahunaan.
Ang angay nimong buhaton kon tinud-anay kang nahigugma sa imong uyab mao ang pagpakita sa iyang mga ginikanan, imong ipakita nila nga sayop sila, nga pwede nimo iasenso ang imong kinabuhi uban sa ilang anak. Wala sad ta masayod no kay wala pa man sad masayod ang mga ginikanan nga mabdos siya. Basin motugot ra kay naa na man na.
Ayaw tawon biyai ang babaye kay luoy ang mahimo ninyong anak nga way papa o pamilyang matawag. Salig sa kahitas-an, Dong. Kon tim-os imong tuyo, tabangan gyud ka niya. Daghang salamat.
PAPA JOE
No comments:
Post a Comment