Sugilanon: May adlaw dang mohilak ka

NAGBUSAGAK ang tubig sa gripo sa pagkaligo ni Roberto. Naligo siya kay mami­sita siya kang Margarita, bisan sagol kulba ug kahinam ang iyang gibati tungod kay sobra ka-estrikta ang dalaga, bisan igo-igo lang ang kahimtang kay usa man ka taxi driver ang iyang amahan nga si Manong Onyot ug ang iyang inahan, si Manang Adela, trabahante sa Mepza. Didto sa balay nilang Margarita gipadayon si Roberto sa dalaga. “Margarita, sa una lang nako nga pagkakita nimo, gibati ko dayon ang paghigugma nimo. Mao nga nia ko karon aron ipadayag kining akong pagbati,” matod ni Roberto nga gikulbaan. “Uy, Roberto, ayaw na lang pagpangahas sa imong gugma kay ikaw usa lang tawong mosimos. Giluod ko sa imong dagway, busa gikan karon dili na ko gusong mopakita ka pa nako,” ni Margarita nga masuk-anon. “May adlaw dang mohilak ka, Margarita, tu­ngod nako. Ikalipay ko unya kon kini mahitabo.” “Kon kanimo lang, Roberto, di ko usikan ang akong mga luha!” mapahitas-ong namulong si Margarita.

Tungod sa kabati sa giluwatang pamahayag sa dalaga nga nakainsulto sa pagka tawo ni Roberto, nakahukom siya nga manimpalad. Naningkamot siya nga maka-eskuyla sa siyudad diin siya nag-working student. Tungod sa iyang pagka kugihan natuman ang damgo niya nga mahuman ang kurso nga gipangandoy, nga mao ang abogasiya.

Sa pag-irog sa mga adlaw, bulan ug katuigan, wala na sila magka­kita ni Margarita.

USA ka adlaw niana may trahedya nga niabot sa kinabuhi nilang Margarita. Ang iyang amahan nga taxi driver, si Manong Onyot, nakasaghid og bata. Naproblema sila kay gikiha man si Manong Onyot sa ginikanan sa bata. Wala silay igong salapi nga ikagasto alang sa usa ka abogado. Mao nga gitambagan sila pag-adto sa Public Attorney’s Office (PAO) nga maoy mo-depensa sa mga kabos.

Sa didto na sila sa PAO daw dili sila maka­tuo kay ang abogado nga molaban kanila mao man si Roberto. Nagsul-ob kini og barong tagalong.

“Margarita, ayaw kamo og kabalaka, kay paninguhaon nako nga maareglo ang kaso ni Manong Onyot,” pasalig ni Roberto nga malipayong mitutok sa dalaga.

Apan wala kapugngi nga midahili ang mga lusok sa luha ni Margarita sa iyang kaapingan.

Naulaw siya kay usa na man ka abogado ang iyang gidaugdaog ug giinsulto kaniadto nga maghahalad. Nangayo siyag pasaylo.

“Nahibalo ka ba, Margarita, nga gikalipay ko ang pagluha mo? Nagpasabot na ba kana nga sugton na ko nimo?”

“Imo pa diay nga ipangutana ug ipaklaro? Sige… Oo na… gisugot na tika. Pwede na nga ikaw mangasawa nako,” ni Margarita nga namahid sa iyang mga luha.

“Salamat, Margarita. Puhon, inigkahuman kog areglo ning kaso ni Papa mo, dad-on ko akong ginikanan sa inyo aron mamalaye kanimo,” ni Roberto nga migunit sa mga kamot sa dalaga. (KATAPUSAN)