Ako si Jervy, 22 anyos. Bisan sa akong pangedaron karon, di na maihap ang mga babaye nga akong gikarelasyon ug gikalambigit sa kinabuhi.
Taga Davao del Sur ko apan nia na sa Davao nagpuyo sud na sa duha ka tuig.
Apan sa wala pa ko miari sa Davao, daghang mga babaye nga akong gikaila ug nakarelasyon sa amo. Dunay duha nila akong naka-live in, apan wala magdugay, nagkabuwag ra sab mi.
Human nila, duna koy nauyab nga babaye. Para nako lahi siya kanila. Para nako lahi ang akong pagbati ngadto niya.
Ako siyang gihatagan sa tanan kong pagtagad ug pag-amoma. Kanunay kong gipakita niya nga nag-care ug nagmahal ko niya.
Di ko maaguwanta nga di ko siya makita sa usa ka adlaw. Mingawon gyud ko kaayo niya. Dugay-dugay gyud ang among relasyon.
Apan miabot ang panahon nga namatikdan ko nga di na siya ganahan nako.
Hangtud nga miangkon siya nga nakauyab siya og lain. Kon ako siyang papilion namo, di sab siya makahukom. Hangtud nga nagkahanap na ang among maayong pagtinagdanay.
Nakahukom kong mopalayo kaniya aron nga maalim ang samad sa akong kasingkasing. Mao nang nia ko sa Davao.
Apan naglisud ko og dawat sa nahitabo sa among relasyon. Kay di man gyud nako siya makalimtan sa akong kinabuhi. Unsa may akong buhaton?
Jervy
Jervy,
Lisud gyud kalimtan ang tawo nga natun-an mo nang mahalon sa kinabuhi.
Wala man seguroy panagbulag nga di sakit. Gawas lang kon wala ka na mahigugma niya. Apan kon nahigugma ka pa niya, lisud gyud siyang kalimtan nga ingon lang niana kasayon.
Gani dunay uban nga wala maka-recover sa kagul-anan, mikutlo sa ilang kinabuhi. Kini ang tinuod nga reyalidad sa gugma. Busa nakasabot ko sa imong kahimtang karon.
Apan timan-i nga ang tanan dunay katapusan. Wala man gyuy butang ibabaw ning kalibutan nga milungtad. Tanan miabot sa ilang katapusan. Kini ang angay nimong hunahunaon.
Mao sab ni sa atong pagbati. Tinuod lisud pa siyang kalimtan ning panahona kay wala pa man maalim ang samad nga mugna sa inyong panagbuwag.
Ang imong hunahuna nakatutok pa kaniya bisan kon nia ka na sa layong dapit. Apan moabot gihapon ang panahon nga imo ra siyang malimtan ug madawat ang nahitabo sa inyong relasyon.
Angay nga lig-unon mo ang imong kaugalingon ning panahona. Instead nga magtago ka sa balay, go out ug meet with your friends aron nga malingaw ka. Pag-reach out sa ubang mga tawo. Apil og mga grupo ug mga aktibidad sa komunidad. Kay niining paagiha dali ra unya ang imong recovery sa nahitabo. How do you know nga dinhi nimo mahibalag ang babaye nga maoy gitagana sa Ginoo alang nimo?
Noy Tikyo
No comments:
Post a Comment