Tambagi Ko Noy Tikyo: Naibog sa amo

DEAR Noy Tikyo,

Tawga lang ko sa ngalan nga Susan, 20, taga probinsiya sa Davao del Norte. Nia ko karon sa siyudad sa Davao kay nanarbaho isip katabang sa balay.

Lisud ang pagpangita og trabaho apan maayo na lang kay dunay magtiayon nga buotan nga maoy mikuha kanako ug gipasulod og trabaho sa ilang balay sud na sa unom ka bulan.

Wala na koy makita nga laing trabaho tungod kay high school ra man ang akong nahuman. Apan bisan pa man niini, malipayon man ko sa akong trabaho kay buotan man ang akong mga amo. Ila pa gani kuno kong pa-eskuwelahon sa sunod abri sa klase.

Ang problema kay samtang nagkadugay ko sa ila, naibog na man ko sa akong amo nga lalaki. Batan-on pa man god siya ug buotan sama sa iyang asawa. Hinungdan nga misamot ang akong pagbati niya.

Wala hinuon siya mahibawo sa akong feeling niya. Pero kon naa man god siya kay kilig gyud kaayo ko ilabi na kon suguon ko niya.

Unsaon man nako ang akong feeling niya? Paundayonan ko na lang kaha ang akong gibati, bahala na kon unsay mahitabo? Basin unya og pahawaon ko sa akong trabaho kon mahibaw-an ang akong pagbati niya. Salamat, Noy.

SUSAN

*****

Susan,

Hangtud nga di ka magpadala sa imong gibati ngadto sa imong amo nga lalaki, di ka mahawa sa trabaho. Apan how long nimo matago ang pagbati sa imong kaugalingon? Kini mao ang pangutana karon ilabi na nga kanunay mong magkita sa balay.

Kini bayang imong pangedaron, mag-uros-uros pa gyud ang imong pagbati nga posibleng mohatud kanimo ngadto sa pagpakasala.

Talagsaon ra baya ning imong mga amo nga maayo sa katabang. Dunay uban nga mga amo nga di makaon ang batasan ngadto sa ilang katabang. Tan-aw nila slave ang ilang mga suluguon mao nga halos di na pakan-on ug patrabahuon og maayo.

Mao nga sayang kaayo kon imo ning palabyon nga oportunidad sa imong kinabuhi.

Ayaw na lang og expect nga mahigugma kanimo ang imong amo nga lalaki kay it will never happen. Di siya puwedeng makigrelasyon nimo kay minyo na man siya.

Kon ugaling mahigugma siya nimo, mahimong komplikado ang inyong kinabuhi ug maguba ang imong kaugmaon. Mao nga kalimti na lang kining imong pagbati niya.

Inay nga magpunay ka og hunahuna ug maghinuktok niya, mas maayo pang imo na lang dawaton ang hanyag nila nga paeskuwelahaon ka. Mas nindot nga mao ni ang imong tinguhaon kay alang man kini sa maayo mong kaugmaon.

Kanang imong gugma, i-divert na lang kini sa uban nga way kabilinggan sa kinabuhi. Apan unya na kon mahuman ka na og eskuwela.

Ikontrol ang imong kaugalingon aron nga di ka makahimo og sala sa imong mga amo. Ayaw padala sa sayop nga pagbati kay basin kon magbasol ka unya.

Bugtii ang kabuotan sa imong mga amo pinaagi sa pagbinuotan sab ngadto nila. Serbisyohi sila og maayo kay naglantaw man sab sila sa imong kaugmaon. Ayaw usiki ang oportunidad nga miabot sa imong kinabuhi.

NOY TIKYO