Tawga ko sa ngalang Dodong, 60, nga buwag sa akong asawa mga15 ka tuig na ang nakalabay.
Karon nga nag 60 na ko, naay usa ka tawo nga lalake nga niabot diri nako ug nangayo og gugma nga andam sab ko mohatag kay sa dugay nang panahon wa ko ni masultihi. Siya ang akong anak sa gawas. Traynta ka tuig kapin na siya ug bata pa siya dihang una ming nagkita.
Apan karon nipatim-aw siya aron di daw para magsamok kon di ganahan lang siya nga maka ila nako isip amahan apan nahadlok ko nga mahibaw-an sa akong mga anak nga naa koy anak sa gawas kay basin masuko sila nako kay mao ra ba ni ang rason nganong nagbuwag mi sa ilang mama.
Unsaon kaha nako ning akong sitwasyon nga maluoy sad ko sa akong anak sa gawas kay gipasagdan siya sa iyang mama kay minyo naman sa lain?. Palihug tambagi ko.
DODONG
Dodong,
Kana kay naa na man na nga sitwasyon, kinahanglan nga lig-unon nimo imong kaugalingon ug sultihan sab nimo ang imong mga anak kabahin sa anak nimo sa lain.
Siyaro na man sad, makasabot ra na sila kay mga dagko nana sila. Makasabot nasad na sila nga walay ang labot ilang igsuon kay bunga kini sa sayop nimong binuhatan kaniadto. Katungod sad sa anak nimo sa lain nga makaila ug makadama sa imong gugma.
Luoy baya sab kaayo siya. Pasabta lang gyud og maayo ang imong mga anak ug kon may mga pulong silang bati, mao nay giingon nga natural lang na nila nga masulti isip paglaban sa ilang mama. Kahibawo ko nga makasabot ra sad na imong anak sa lain kay dako ang edad.
Suma pa sa imong suwat lahi man iyang rason nganong nagpakita siya. Kon ugaling naa pay lain nga mga anak sa gawas, usaha na lang na og sulti sa imong mga anak para kausa ra ang kasaba. Salamat ug hinaot masulbad ra na ang imong problema.
PAPA JOE
No comments:
Post a Comment