Sugilanon: Salin sa kabog

SAMTANG naglimpiyo si Jocor sa iyang sapatos nga panit, muro ang nawong sa iyang inahan nga milabay lang niya nga way tingogtingog. Nakasabot siya nganong ingon niini karon ang gipakita sa iyang Nanay Matilde ning buntaga. Wa pa mahubas ang kasuko niini kaniya sa lalis nila kagabii.

“Naunsa ka, Jocor, nga mangasawa ka nianang taga siyudad nga wa ta mahibawo diin gikan, ka wa nimoy buot nga maestro man unta ka! “ Singgaak sa iyang inahan nga nasuko.

“Matahom si Daisy, Nay, ug siya maoy akong gihigugma.”

“Gugma god tawon nga bag-o pa man na siya dinhi. Kakusog sad nimo, naay daghan dinhi sa ato, uy, mga buotan pa ug birhen, anha ka anang taga siyudad!”

“Sa ato pa, Nay, di birhen si Daisy. Kana ang imong gipasabot!” Midako ang tingog ni Jocor. Misiga ang mga mata sa iyang inahan nga nahimangod sa iyang tingog.

“Basta, di ko gusto anang bayhana!” Daling mitindog ang iyang inahan ug misud sa lawak niini nga gilugapak sa pagsira. Nakatungok siya sa gipakita sa iyang inahan.

Nakita niya ang iyang inahan nga nag-andam sa iyang painit sa lamesa. May nahunahunaan si Jocor nga makatibhang sa kasuko sa iyang inahan. Dugang kawili pod ni seguro kaniya sa iyang inahan kay magminyo na siya. Apan di siya makaako sa pagbiya sa iyang inahan nga mag-inusara sa pagpuyo. Siya ra ang bugtong anak ug ang iyang amahan namatay sa bata pa siya.

“Nay, suweldo na nako ugma ug palitan tikag sinina igsisimba kanang bag-ong uso ang tabas.” Migilaw ang mga mata ni Jocor sa pagtuo nga mopahiyom ang iyang inahan. Apan sukwahi sa iyang pagtuo.

“Unsa, kadaghan pa nakog sinina ayaw kog ulu-ulohi ha! “Daling nanaog sa silong si Nanay niya binilin siya nga morag natamparos sa tubag niini. Apan nagpadayon siya sa pagpakigkita kang Daisy. Moabot ra unya ang adlaw nga mosabot ang iyang inahan kaniya, maoy dako niyang pangagpas. Agwantahon lang niya kining way tingog-tingog sa iyang inahan.

Nangapulak ang mga adlaw. Hapit na sad mangahinog ang ilang chicos sa tugkaran . Dad-an niyag mga chicos si Daisy aron makatilaw sa katamis niini sama sa iyang gugma.

Dihay mga higayon nga mohatag untag binta si Daisy, apan diha ra siya sa paghawokhawok sa lumoyng mga ngabil niini.

Usa ka buntag niana nakita niya ang hinog nilang mga chicos nga nangapahak ug nangatagak sa yuta. Gipistahan sa mga kabog sa miaging gabii. Gisanapan siya sa kalagot ug nanganti nga iya kining pamusilon sa iyang pusil de bomba sunod gabii. Nanaog siya aron hipuson ang chicos nga ningpasad sa yuta.

Kalit miabot si Noy Luis ang uyoan ni Daisy. Mitan-aw niya si Noy Luis ug dayon nitan-aw sa mga pahak nga chicos sa yuta.

“Dong Jocor, aduna koy itug-an nimo aron di ko makonsiyensiya. “ Miduol kini kaniya. Mihunghong dayon si Noy Luis. Misiga ang mga mata ni Jocor sa gihunghong sa uyoan ni Daisy, nga kini nagsabak na diay sa binhi sa iyang hinigugma didto sa siyudad ug milayas kini.

Mibanos ang kahilom, wa na madungog ni Jocor ang nagpalayo nga tunob sa nagsulti kaniya sa kamatuoran. Mihangad siya sa bentana, diha ang iyang inahan nga naglantaw sa mga chicos nga salin sa mga kabog. Husto ang iyang inahan sa mga babaye sa siyudad.

Makatilaw unta siyag salin sa kabog ug ma-salvador del mundo pa. (Katapusan)