Duna koy problema sa akong pagpuyo. Duna koy ka-live in. Nagkauyab mi og duha ka tuig ug nagpuyo sud sa usa ka tuig. Apan ang among pagpuyo nahimong gubot. Kadaghan na mi nagbuwag, unya magbalik na sab. Nangita man god siya og lain busa nagkayagaw hinuon ang among pagpuyo.
Ako siyang gipapili kon kinsa namo, ako ang iyang gipili. Busa nagbalik mi og ipon. Apan wa gihapoy kalinaw ang among panag-uban. Kanunay lang away. Ning tuiga, wala nay klaro ang among relasyon. Kay halos di na man siya manumbaling nako. Buot niyang mag-iyahay na lang mi kay di man gyud mi magkasinabot bisan unsaon.
Nagduda sab ko nga nagbalik sab sila niadtong babaye nga iyang nauyab kaniadto. Nahigugma ko niya, gani nagtuo ko nga kami na gyud sa hangtud. Apan wala kini mahimong reyalidad kay wala na mi karon. Nia na ko ipon sa akong ginikanan. Apan guol pa gihapon ko sa gidangatan sa among relasyon. Buot sa akong parents nga magbalik na lang mi sa akong kapuyo kay magul-anon man ko. Gusto silang magmalipayon ko. Apan unsaon man nga wala na man siya sa akong kiliran? Mahimo pa ba ming magbalik bisan pa niining among kahimtang karon?
Debie
Debie
Lisud og magbalik mo kay wala may kalinaw gihapon ang inyong pagpuyo. Balik lang gihapon mo sa naandan ninyong buhat sa dihang nag-uban mo sa imong ka-live in.
So, ang mahitabo mao lang gyud gihapon, on and off ang inyong panag-uban. Mora ba og mag-away mo karon, magbalik sab mo unya. Same story gihapon.
Mao na nga lingkawas na sa maong sitwasiyon. Di maayo nga makig-uban sa tawo nga ikaw ra ang nahigugma ug siya wala. It' should be a two-way relationship kon gusto kang magmalampuson ang inyong panag-uban. Di lang ikaw ang mahigugma, kon di angay sab siyang mahigugma nimo. Kon tinguha sa imong ginikanan nga magmalipayon ka, di ang pagpakigbalik sa imong ka-live in, kon di ang pag-move on na sa imong kinabuhi ug kalimtan na siya.
Hinuon, di ingon niini kadali ang paghikalimot sa nahitabo kay nahimo na man sab siyang kabahin sa imong kinabuhi. Apan it's better nga maka-recover ka gikan niini aron nga di na kaayo sakit para nimo. Hangtud nga di ka maka-move on, di ka pa gayud magmalipayon sa imong kinabuhi. Kon gusto kang matabangan nga magmalipayon, tabangi una ang imong kaugalingon kay ang imong kalipay mag-agad ra man sab kanimo.
Noy Tikyo
No comments:
Post a Comment