Vallena: Nahimong taytayan

Pedal

NIADTONG Semana Santa, daghan ang mga tawo nga nagpahimus pagbiseklita. Ang akong mga kauban sa Sun.Star nakakita sa daghang mga siklista nga nanagpanon ngadto sa kalungsoran. Nagpahimus sila sa pagbiseklita tungod sa taas nga bakasyon.

Ang lagyo nga mga biyahe nga modagan na og mga 100 kilometros sagad tawgon namo og long ride. Taas kay sagad sa pagpadung pa lang molanat na og labing minus duha ngadto sa tulo ka mga oras. Kana kon patag lang.Unsa na kaha kon tag-as og mga subida, moabot pa og upat ngadto sa lima ka mga oras.

Kon manungas mi og lagyo, mogikan mi sa balay sa alas 5:30-6 sa buntag, sagad mabalik mi alas 3-4 sa hapon. Laspag na kaayo. Di na ganahan mokaon kay mas lami na ihigda tungod sa kaluya. Apan ang kalipay sa pagsud-ong sa maanindot nga talan-awon sa kabukiran nga amoang maagian di kabayran og salapi. Wa pa nay labot sa paghinagbog sa bag-ong mga higala nga sama og hilig, biseklita.

Ayaw kahibulong kon nganong nagkadaghan ang nagbiseklita karong mga panahuna. Daghan ang nakaamgo nga mao ni ang matang sa exercise where you can go anywhere while you sweat it out. Lingaw, dib a?

Bisita

Ang wa namo mahibaw-I, dunay taga Iloilo nga mibisita dinh sa Sugbo nga nagbiseklita sa iyang paglibot aron motan-aw sa Harang Dakbayan atol sa Semana Santa. Didto na ko mahibawo kang Jay Garganera sa pagbisita ni Drilon, usa ka urban planner nga sama namo og panglantaw, nakakita sa biseklita nga usa sa mga maayong alternatibo nga transportasyon sa usa ka malungtaron nga komunidad.

Giubanan siya nila ni Jay ug Felix Canono, Jr., ang among gentle giant nga bisan nasuko na, ngisi lang gihapon. Nalingaw kayo si Drilon sa iyang paglibot sa dug-ol ra kayo nga mga dapit nga nahimo nang tipik sa kasaysayan sa Sugbo.

Nahimo sila si Felix ug Jay nga mga tour guide. Hinuon, kining duha nako ka mga higala lumad man ni sila nga nagpuyo sa downtown Cebu City nga duol ra sa waterfront area busa bisan mopiyong pa ni sila, katultol sila sa mao nga mga dapit.

Ang taytayan ra nila ni Felix, Jay ug Drilon mao ra ang folding bike. Nakugang si Drilon nga nakakita sa collections ni Jay nga dul-an na sa 60 ka folding bikes nga pulos branded, wa pay labot sa iyang gipamaligya nga folding bikes.

Ingon pang Drilon, sumala sa asoy ni Jay nako, nga una pang higayon sa iyang paglibot sa Pilipinas nga nakakita siya sa kadaghan sa mga folding bike. Mao sab ni ang iyang gisulti sa iyang account sa Facebook.

Gimingaw

Mga kapin na ko sa tuig nga wan a makauban sa akong mga higala nga kauban sa forum sa Cebu Cycling. Bisan wan a ko makakuyog, naa gihapon miy connection tungod sa FB. Mao nang makahibawo ko sa ilang mga biyaheng lagyo basta mo-post sila og picture.

Nakakita ko sa among ride last year nga gi-post sa akong higala nga si Paul Pe­rez nga mas naila nga si Paul Baguio, usa sa mga forum administrator sa CC. Bisan hangak ug sakit sa bagtak, liog ug bukton sa pagtinungas, smile lang gihapon mi sa atubangan sa camera kay makalingaw baya. Isig pakita kinsay mas kusgan ug mas paspas motungas. Unyag abot sa ibabaw,maorag mga bata nga magsungogay. Sa biseklita diha ko nakakita sa grabeng kalipay nga magkuyog ug magpanon for the love of biking.