Talk to Papa Joe: Gaba kaha ni?

DEAR Papa Joe,

Tawaga lang ko og Ana, 19 year old na. Taga Negros ko pero nagtrabaho diri sa Cebu. Ang akong suliran kabahin sa gugma nga tan-aw pa nako nasayop.

Last year gihagad ko sa akong uyab nga magpuyo mi apan wa ko musugot kay wa siya’y klarong trabaho. Okay ra man sad siya. Magpaabot lang siya. Apan di malikayan nga masakay ko sa uso ron.

Naa koy ka textmate nga taga amo ra sad nga lungsod. Buotan ug maayo modala og timbaya sa text. Wa madugay nanguyab siya nako. Tuod pila ra may istorya, ako siyang gisugot kay sa pagpaminaw nako, buotan ug responsable siya nga pagkatawo. Mao nga nagsabot mi nga magkita sa pista sa amo.

Sa walay langay, nangita ko og bikil sa akong uyab ug ako siyang gibuwagan. Mao to, nilarga ko og Negros ug ingon niya mohapit lang ko sa ilang balay kay duol ra sa terminal. Niuyon ko kay nahigugma na man ko niya kay nindot siya sa text. Tuod man nagkita mi. Angkunon nako nga wala ko masayop, buotan siya apan di nako madawat ang pagkatawo niya kay tan-aw nako wa gihapon koy ugma kay siya bakol.

Sa tinuod na-discourage ko apan wa ko magpakita nga na-turn off ko. Pag-uli nako balik diri sa Cebu, wala na ko mo text ug motubag niya. Ganahan sad ta ko makigbalik sa akong ex apan mauwaw ko. Unsa may akong buhaton? Tambagi ko.

ANA

Ana,

Mao nay resulta sa mga aksyon nga wala huna-hunaa. Di gyud maayo nga moambak dayon nga di nimo masayran kon unsa kalawom sa tubig. Mao nay giingon nga not all that glitters is gold.

Hinuon bata pa ka mao nga di sad ka mabasol nganong ingon ana imong pang-hunahuna.

Ayaw na lang pakigbalik sa imong uyab oi. Mauwaw sad ka kay imo siyang gibaliwala. Kay kon nahitabo pa nga perfect imong ka textmate, makahuna-huna kaha ka sa pagpakigbalik sa imong uyab?

Usba na nang batasana nga maorag sigurista kay daghan na ang nahagtos niana. Kat-uni ang pagtulun-an sa Ginuo para ma-value nimo ang usa ka tawo. Nianing panghitaboa, di lang imong ex ang imong gipasakitan, kon di ang imo sang ka- textmate. Apil pa gani ang imong kaugalingon, imong konsensya. Charge to experience na lang na, Day. Be good next time.

PAPA JOE