Tambagi ko Noy Tikyo: Di maayo'g relasyon

Dear Noy Tikyo,

Ako diay si Ezekel, 36, minyo ug may anak. Nagtrabaho sa usa ka pharmaceutical nga kompanya. Halos everyday ko nagbiyahe kay tua man sa layo ang akong mga kliyente.

My problem is about sa relasyon sa akong asawa. Tinuod 10 anyos na mi nga minyo. Apan ambot ba nga di man maayo ang among relasyon in the sense that mora og layo ra mi sa usag-usa. Di mi at home sa matag usa. Mora mi og mga estranghero sa among kaugalingon bisan sa kadugay na sa among panag-ipon. Seldom ra sab mi mag-sex kay mora og maulaw man mi sa usag-usa.

Bahin sab sa kuwarta, ako ang nag-budget sa panginahanglan sa balay. Ako ra siyang hatagan sa igo lang nga kantidad alang sa eskuwelahan ug mga panginahanglanon sa balay. Kay kaniadto man god, nagamit niya ang kuwarta nga akong giintrigo niya. Unya wala may nakita kon unsay iyang gipalit.

Ambot asa mipadung ang kuwarta. Mao nang ako na lang ang mogunit sa kuwarta. Binlan lang nako sila kon mobiyahe ko.

Unsa kahay akong buhaton aron nga mabalik ang nindot namong relasyon?

Ezekel

Ezekel,

Dinhi nimo makita kon unsa ka bililhon kon suod ang asawa ug pamilya. Yagaw gyud kaayo ang dagan sa kinabuhi kon di magkasinabot ang magtiayon sa panimalay.

Seguro nahitabo ni tungod sa matang sa imong trabaho. Although napulo na mo ka tuig nga minyo, apan you never explore yourself sa kinabuhing magtiayon tungod kay kanunay ka ra man nga wala sa inyong balay. Mao nang mora mo og estranghero sa inyong kaugalingon sa imong asawa.

Mauwaw mo nga magpakita sa inyong tinuod nga pagbati sa usag-usa kay wa man mo maanad nga mamarayeg sa usag-usa. Naglisud mo og pagpagawas ug pagpakita sa tinuod ninyong pagkatawo sa usag-usa bisan sa kamatuoran nga minyo na mo. Wa pa mo maka-adjust og maayo sa inyong mga kaugalingon kay you never spent ample time with each other aron ilhon ang tagsa-tagsa ninyong pagkatawo.

Kon gikinahanglan ka niya, wala ka, Kon gikinahanglan mo siya, wala sab siya.

Mao nang I think panahon na nga mohatag ka og igong panahon sa imong pamilya. Di lang sa imong asawa, apan sa imo sab nga mga anak. Gahini og panahon nga magka-bonding mo sila. Kana kon love mo pa ang imong pamilya.

Kay ang gugma demands your time and presence. Ayaw paabota ang panahon nga di lang ang pagbati sa imong asawa ang malayo kanimo, apan ang imo sab nga mga anak. Di pa man ulahi ang tanan. You have still time to make up your mind. Tinuod importante ang trabaho aron nga masuportahan ang pamilya, apan bililhon sab nga maka-establisar og maayong relasyon sa pamilya. It's only a matter of managing your time.

Unya salig sa imong asawa. Lisud man god kon mawala ang pagsalig sud sa kaminyuon. Kon both of you way pagsalig sa usag-usa, segurado nga dako kini og epekto diha sa inyong pagpuyo.

Noy Tikyo