Usa ko ka minyo. Dunay mga anak.
Taga Davao del Sur mi, apan nia mi magpuyo sa siyudad sa Davao kay naa man mi balay diri. Magbisitahan lang mi didto sa amo sa probinsiya.
Ang akong asawa maoy dunay trabaho dinhi. Samtang ako maoy nagdumala sa gamay namong tindahan sa mga sapatos, sinina ug uban pa nga naa ra tupad sa among gipuy-an.
Duna koy tulo ka mga katabang nga babaye. Duha nila maoy nag-atiman sa tindahan samtang ang usa maoy nag-asikaso sa balay sama sa pagluto, paglaba ug paglimpyo.
Kami ra gyud halos matag adlaw mahabilin sa balay kay motrabaho man ang akong asawa, samtang ang akong duha ka mga anak mangeskuwela.
Sabado ug Dominggo lang mi nga magkahiusa sa balay ug adlaw.
Sa tulo, ang katabang sa balay maoy nasuod kaayo nako.
Ang problema kay sa sobra namo kasuod, mora og modikit na man kaayo siya nako. Usa ka higayon ako siyang naabtan sa sala nga naglingkod. Mitupad ko niya, kalit man lang siya og sikit nako ug migakos. Mao tong wala ko kapugong sa akong gibati, ako siyang gihagkan ug gigakos sab. Mingisi ra man sab siya nako.
Didto na nagsugod ang among tinagoang relasyon. Panahon sa iyang day-off, magkita mi sa motel ug mag-sex.
Kalima na namo ni buhata apan wala hinuon siya momabdos.
Karon nakonsensiya ko sa among gibuhat mao na nga magpatambag ko nimo bahin ning akong sitwasiyon karon. Salamat.
DAN
*****
Dan,
Ang pagkakonsensiya maoy produkto sa pagbuhat og butang nga di maayo sama sa nahitabo kanimo karon. Nakonsensiya ka na kay nakabuhat ka man og dautan ngadto sa imong asawa. Di lang sa imong asawa, apan sa imong mga anak ug ngadto sa Ginoo nga maoy nagbugkos kaninyo sa kaminyuon.
Kon di ka buot nga maguba ang imong pagpuyo, mas maayo nga mohimo ka na og desisyon karon ug di na magpaabot nga mas modako pa ang problema.
Ayaw na paabota nga madiskobrehan sa imong asawa ang imong pagpangluib una ka mohimo og lakang nga maputol ang inyong relasyon nianang imong katabang.
Tinuod nga lawom na ang inyong panag-uban nianang bayhana apan di nimo ikalimod nga minyo ka na ug dunay mga anak.
Usa ra gyud ang imong mahimo aron nga maputol ang inyong relasyon ug kini mao ang pagpahawa kaniya diha sa inyong panimalay ug ayaw na og hatag og higayon nga magkahimamat gihapon mo kon gusto mo nang magbag-o.
Apan ugaling kon mahitabo man nga momugna kini og kasamok, angay lang sab gyud nga manubag ka sa imong gihimo. Dawata ang mamahimong linugdangan unya sa imong gibuhat bisan unsa pa man kini.
NOY TIKYO
No comments:
Post a Comment