Tambagi ko Noy Kulas: Ang silingan

DEAR Noy Kulas,

Naa koy ka-relasyon sa among silingan nga minyo pero ang bana seaman.

Nagsugod lang ni dihang nagkakita mi sa usa ka mall. Nagsuroysuroy siya, maora og ga window shopping dihang nagkasugat mi. Iya kong gi-invite og pangape. Didto nag-estoryahanay mi ug naghatagan og number. Nangutana siya nako di ba selosa akong asawa if mo text siya nako. Ako siyang giingnan nga taymingon lang nga wa diha akong misis.

Gihatagan nako siya og oras. Nagsugod na mi og text. Okay ra siya kay iyang bana toa man sa abroad pero ang ako dia ra diri.

Magtago-tago mi og kita kay mahadlok mi dunay makakita namo. Hangtod nga ako siyang giingnan nga adto na lang mi mag-estorya og private room aron way makakita. Nisugot sab siya. Siyay mopalit og kape ug pagkaon namo. Pero sa first namong check-in, galain ang lawas nako. Ako siyang gisuwayan og kupot unya gigakos. Kaingon nako og molugnot, okay ra man niya. Pila ra may estorya, duna gyuy nahitabo namo.

Uhaw gyud siya sexually. Wa ko magdahom ingon adto siya ka wild sa kama. Niangkon siya nga ako ang ikaduhang lalake sa iyang kinabuhi kay iyang first BF iyang husband. Ingon niya di mi maghuna-huna og love kay para niya, pahungaw lang sa iyang gana sa sex ang amoa. Gusto lang siyang malingaw. Ganahan ko sa iyang gisulti pero nagkadugay, na-inlove na man hinuon ko niya. Mingawon na kaayo ko niya. Ako siyang gisultihan.

Giingnan ra ko niya nga di mi mag serious kay pulos mi minyo.

Noy, unsa man akong buhaton ron? Nakuhaan gyud akong love sa akong misis tungod niya. Naglibog na kaayo ko ron. Tambagi tawon ko, Noy.

ARIEL

Riel,

Nakahibawo man gyud ka nga minyo mong duha, wa na lang unta na nimo tagda nang imong silingan. Madugay o sa madali, masakpan ra gyud mong duha kon dunay makakita ninyong magkuyog. Unya kon masakpan mo, di man mo pakpakan ug duyanon. Magubot man gyud na.

Ibutang ta kon ang imong asawa makahibawo, di kaha na sulngon ang imong silingan? Unya kon makahibawo na ang pamilya sa babaye, di kaha na mosumbong sa iyang bana? Magubot gyud, di ba? Gawas sa kauwaw, possible pang mabungkag ang imong pamilya.

Busa, undanga na ninyo. Ingna siya nga putlon ang inyong relas­yon kay bisan duna moy feeling sa usag usa, di man gihapon na pwede. Samot na nga ang iyaha diay pagpagawas lang sa gana sa sex. Maora ka og iyang giabangan pinaagi sa pagpakaon ug gipa­kape. Tinuod, sex is pleasurable but what you have is very dangerous kay tinago-tago tungod sa inyong mga kabilinggan sa pagpuyo.

Huna-hunaa usab kon ang imong asawa maoy mangabit, unsa may imong bation? Mokatawa ug malipay kaha ka? Bisan pa kon mapasaylo nimo siya, di kaha maglain ang imong huna-huna everytime molakaw siya? Di baya sayon nang butanga kay duna gyud nay epekto sa panghuna-huna sa tawo nga naigo. So, ingna siya nga magbuwag mo ug putlon ang inyong relasyon. The best start is to cut your communication ug di na magkita aron di na mo matintal. Putla samtang wa pa moabot ang problema.

NOY KULAS