Tambagi ko Noy Kulas: Biyuda

DEAR Noy Kulas,

Usa ko ka biyuda sulod na sa pipila ka tuig. Duna untay opportunities nga makaminyo ko og lain pero akong gipalabi nga maatiman ang mga bata. Nagtungha pa sa college ang mga bata dihang namatay ang akong bana sa abroad. Nahugno ko primero pero akong na-realize nga nagkinahanglan pa ang among mga anak nako.

Kay nakatigom mi sa akong bana ug duna miy tindahan, wa ko maglisod sa pagbuhi sa among mga anak. Ang duha karon nagtrabaho na ug mitabang og gasto sa lain namong mga anak. Tautaud ang akong sakripisyo alang sa mga bata aron lang maayo ang ilang future.

Naay taudtaud nang nanguyab nako nga lalake. Ulitawo siya pero manghod lang nako og pila ka years. Sa tanan, siya persistent kaayo. Wa nako siya tangdoa ug wa nako balibari. Ingon niya makahuwat siya nako kon kanus-a ko motangdo.

Ang akong problema ang akong mga anak. Di sila mosugot nga magminyo ko og lain. Di sila gustong mag-uyab-uyab ko kay di sila gustong ang ilang papa pulihan og lain. Pero unsaon man nako nga gusto kong dunay ikauban kon matiguwang na ko. Mag-unsa man ko kon mangaminyo na ang akong mga anak?

ROSE

Rose,

Imo na bang gi-meet ang tanan nimong mga anak aron hisgutan ni? Kana bang naa silang tanan aron ma-discuss ninyo og maayo. Mag-atubang gyud mong tanan aron mosulti sila tagsa-tagsa unsay ilang katarungan nganong di sila mosugot nga magminyo ka. Unya isulti usab nimo ang imong katarungan nganong gusto kang magminyo. Wa mo lang gitan-aw ang karon, kon di ang ugma nimo.

Kini man gung ubang mga anak emotional kaayo basta relasyon na ang hisgutan. Ilang tan-aw nga forever na ang relasyon sa ilang mga ginikanan, bisan ang usa namatay na, alang nila magpabilin kini nga di matandog. Naa say uban nga mag-worry basin mapasakitan lang ang ilang parent. Kon di man gani, basin mausab ang relasyon tali nila ug sa living parent kon duna nay laing tawo nga mosulod.

Naa ganiy uban nga dunay apprehension kay basin ang apason katigayunan lang. Naa ra ba gyud nang mga tawo nga mapahimudsanon. Dunay mga biyuda ug biyudo nga nangaigo sa mga mapahimuslanon. Mao bitaw dunay uban nga mosulod gyud og pre-nuptial agreement nga ang partner di makapanag-iya sa mga butang nga na-acquire before sa marriage aron maprotektahan sab ang mga anak ug mismo ang nahingtungdan nga party.

Kon mopasalig sila nga ila kang atimanon ug di ka biyaan, timbanga unag maayo una ka mohukom og imoha. Maayo man nang duna ka say kalipay kay lahi sab nang naa gyud kay kauban sa kinabuhi. Apan maayo sab nang maminaw ka sa imong mga anak kay in the first place, sila man ang imong pamilya. Unya ang pamilya mao nay naa gyud nato pirme magkinaunsa man. Naa sila sa kalipay ug kasakit nato.

NOY KULAS