AKO diay si Mavin, taga Lapu-Lapu city. Usa ko ka minyo. Ang akong bana naa sa Kuwait nag work isip car technician. Sa among lugar diin mi nagpalit og unit, nakabarkada ko. Nahimo nakong suod sila kay ang ilang bana naa man sad sa gawas.
Naa koy anak upat nga gasunod ra ang edad nila. Ang kamaguwangan kay 11 na. Ako diay 30 plus. Pila ra may sugilanon, nagkasuod mi sa akong mga silingan nga niabot sa punto nga magsige na mi og laag hangtod nga nakahimamat ko og lalake sa usa ka bar.
Niadtong gabhiuna naay nahitabo namo hangtod nga nagsige. Apan di mi uyab. Maorag siya lay nipuno sa kamingaw nako sa pakighilawas sa akong bana. Of course wa ko mamabdos kay expert nako ani. Pero karon na konsensya ko kay luoy man akong bana. Pero wala na man koy pagbati niya. Maorag di na gani ko excited makakita niya next month. Unsa may buhaton nako? Please tambagi ko.
MAVIN
Mavin,
Sagad sa akong tambag ana mao nga dili lang basihan ang imong gibati ug katungod nga malipay. Tan-awa ang tibuok hulagway sa inyong relasyon. Daghang mga tawo ang maligsan. Una niana mao ang inyong mga anak. Lain pa niana mao nga kasado mo ug nanaad ka atubangan sa altar nga mahalon nimo imong bana hangtod sa kamatayon.
Palayo na anang lakiha. Kon wala nakay pagbati sa imong bana, ayaw decide dayon nga makigbuwag ka kay basin bunga ra na sa inyong panaglagyo. Luoy tuod kaayo imong bana nga naninguha para sa iyang pamilya.
Ayaw hulata nga maglisud ka og tubag sa imong mga anak kon pangutan-on ka nganong giingon ana nimo ilang amahan. Pag-ampo, Day, nga lamdagan ka kay ikaw ray makasulbad anang tanan nga problema.
PAPA JOE
No comments:
Post a Comment