Tambagi ko Noy Kulas: Kinsa nilang duha?

DEAR Noy Kulas,

Tawga lang ko og Buddy, 24 years old. Ang akong problem ka­bahin ni sa akong makalibog nga kinabuhi.

Naa koy nakaila last November nga girl nga tawgon lang nga Miss A nga naa na karon sa Mindanao ug ako gyud nauyab. Sa first time nga pagpanuroy namo naa man dayon nahitabo.

Sa una feel nako love na kaayo nako siya but later in December naay girl nga sige og text nako. Tawgon lang sad nato siya og Miss B.

Kini si Miss B buotan ug relihiyosa kaayo. Wala sad magdugay ang panahon nagkakami ug naa naa say nahitabo namo then ako pa gyud nakahilabot niya kay love man daw ko niya mao iyang gihatag ang iyang pagkababaye nako. Malipayon kaayo mi karon ni Miss B apan nahugno ko ug na-feel guilty ko karon kay ni- text man og kalit nako si Miss A nga pregnant daw siya og two months.

Unsa man ang akong buhaton nga paatubangon daw ko sa papa ni Miss A. Apan naglibog ko kay mas love man gud nako si Miss B kay kang Miss A? Then nahadlok sad ko basin og buros na sad si Miss B kay daghan na sad nahitabo namo. Please tambagi ug lamdagi ang akong hunahuna. Thank you and God bless.

BUDDY

Buddy,

Ikaduha na man ni nga problema ang imoha kay duna say nagpadala nako earlier. Mao bitaw ni ang problema sa kadaghanan sa mga lalake, manghilabot og mga babaye unya kon momabdos magkaproblema na. Sure, kining duha ka mga babaye imo ning gisaaran nga manubag ka kon sila momabdos. Ikaw na ang bahala basta momabdos. Wa bayay babaye nga mohatag sa bandera kon di sila makaseguro.

Ang labing maayo nimong buhaton mao ang pagpahibawo ug pagkonsulta sa imong pamilya kabahin ning mao nga problema. Kinahanglan nga ang mangatubang, kon unsa man ang imong kaakuhan, mao sab ang imong mga ginikanan. Kon moatubang ka man sa amahan nianang imong uyab, mas maayo kon naa ang imong parents, labina gyud ang imong inahan. Kay kon amahan nimo ang imo lang paatubangon, basin pa unyag magkainitay og estorya. Apan mas maayo gyud kon ang imong parents ang imong atubangon.

Mahimuot man ko sa imong sulti nga mas gihigugma nimo si Miss B karon. Yes, mas nahigugma ka kay wa pa moabot si Miss C. Kon mapul-an ka ni Miss C, naa na sab si Miss D. I mean wa gyuy katagbawan nga moabot nimo kon ang imong approach sa gugma sigeg tirada.

Kinahanglang manubag ka sa imong kaakuhan. Estoryahi si Miss B anang imong problema.

Naa ra niya buwagan ka ba o di. Kon silang duha mabdos, lain na sab nga problema. Sa ako nang giingon, konsultaha ang imong pamilya. Paminawa unsay ilang pagtan-aw ning mao nga problema. Then, anha na ka mohukom what is next. Basta ayaw na pangitag laing problema.

NOY KULAS