Ako si Christine, taga Talisay City, Cebu. 18. Naa ko sa akong amiga nagpuyo ron kay nilayas ko sa amo. Actually nagtaban mi pero gibiyaan ko sa akong uyab. Mabdos man gud ko unya di ko ganahan nga hilabtan sa akong pamilya akong uyab if mahibaw-an nila nga namabdos ko, labi na pulis akong maguwang sa among lugar. Mao nga nakadesider akong uyab nga mangari og Cebu kay naa man miy kaila sa clan namo.
Usa ka squatter ang among gipuy-an. Gi-downnan namo ang among amiga og P2000 sa gamay nga kwarto nga among giabangan. Hangtod nga niabot ang panahon nga wa gyud siya kakita og trabaho diri ug niabot ang panahon nga nibiya siya nako diri.
Pwerte nakong hilak kay wala ko magdahom nga buhaton to niya nako. Karon nga magwalo na ka buwan akong tiyan, nisamot na ko ka libog kay wa ko kahibawo kinsa ang modala nako sa hospital. Gipaningil na sad ko sa abangan, maong galibug ko. Lami na kaayo ipakamatay. Unsa man ang akong buhaton? Galibog na kaayo ko. Tambagi ko, Sir. Daghang salamat.
CHRISTINE
Christine,
Mao nana ang resulta sa di maminaw sa tambag o badlong sa mga ginikanan. Basta bata pa unya badlungon sa parents, sakitan dayon. Dayon og sulti nga di makasabot sa gibati.
Apan kini nasulti sa mga ginikanan kay taas na sila og naagiang panahon ning kalibutana ug nakita nila nga kasagara sa susama nimo og edad, maoy padulngan.
Pero di na ta magbasulay. Ang ato ini mahimo ning leksyon sa sama nimo nga nisulod og sayo sa kaminyuon kuno. Well, sa imong sitwasyon angay nga tunlon nimo ang imong pride ug mobalik ka sa imong parents. Agwantaha ang kasaba kay tinuyoan man nimo kay sa magplano pa ka nga magpakamatay. Makasamot lang na sa problema sa imong ginikanan sa pinansyal, emosyon ug uban pa.
Balik sa inyo kay karon napamatud-an na nimo nga ang lalake nga gimahal nimo walay baruganan. Daghang salamat.
PAPA JOE
No comments:
Post a Comment