Tawga ko sa ngalan nga Khalif, 24 na ang akong edad ug usa ka anak sa gawas sa usa ka Pakistani. Sa akong hitsura pa lang dili na malikayan nga naay mga babaye nga makagusto nako. Taas ug puti baya ko. Dili gani ko maaan nga turko kon di Amerkano.
Naa koy uyab nga si Brenda ug gihigugma kaayo siya nako. Ako ni siyang kababata maong siya ang gipitik sa akong kasingkasing kay nasuhito ko niya. Adopted sad ni siya sa mga Amerkano sa among barangay maong samot nga magkasinabot mi tungod sa among sitwasyon. Kini siya naay half-brother nga suod sad namo kay mga buotan man ilang pamilya pero sa dihang nanagko na mi ug ulitawo na, wala ko magdahom nga bayot diay ang iyang igsuon.
Usa ka adlaw niana iya kong gikamang. Wala ko magdahom nga ingon ana siya. Dili ta ko mosugot ug ako ta siyang kulatahon apan gibaharan ko niya nga kon magdumili daw ko, iya kong dauton sa akong igsuon, apil sa ilang ginikanan para maglayo mi. Di ko mosugot niana.
Karon nagsige na siya og balikbalik og panghagad nako ug ingon pa niya nga kon di ko mosogot, naa kuno siyay video namo ug iyang ipakita sa iyang pamilya maong wala na koy nahimo. Karon guilty kaayo ko. Unsa may angay kong buhaton nga maundang ni? Palihug tambagi ko.
KHALIF
Khalif,
Ang kamatuoran molutaw gyud na. Dili siguro karon pero maora na og patayng lawas nga malunod, molutaw gyud na ug manimaho. Dili ko motudlo nimo nga mamakak pero naa may giingon nga white lies. Hangyua pag-ayo ang imong amigo nga undangon na ninyo kon siya mismo nagpakabana sa feeling sa iyang igsuon.
Pero dili kini garantiya kay di man sila pure nga igsuon gud. Wala ta masayud nga kana tanan bunga sa rivalry sa managsuon. Pero sa gikaingon ko na nga walay di molutaw nga kamatuoran. Kon mahimo sultihi imong uyab ug dawata unsa may mahitabo kay nitugot man sad ka nga pwede ra man nimong balibaran kay wala man ka tiuni og hinagiban, sulti ra man to na pwede nimong depensaan. Ug kon unsay resulta, hangpa na lang. Bata pa ka. Ana gyud nang kinabuhi. Salamat.
PAPA JOE
No comments:
Post a Comment