SALA ba diay nga mahigugma og tawo nga lain og relihiyon? Ako si Bobby, 28 ug nag-work sa Lapu-Lapu City, diin akong nahimamat ang babaye nga akong gimahal. Nahigugma mi sa usag-usa ug paminaw pa namo maorag walay makabungkag na sa among relasyon.
Karon nga naa na miy mga plano sa among relasyon, naghinayhinay na man og katipak ang pundasyon niini. Sa akong pagka born-again, nahigugma ko og usa ka Katoliko, butang na wala mauyoni sa iyang mga ginikanan. Apan sa akong mga ginikanan okay ra nila, total naa ra sab sa babaye kon magpa convert siya o di.
Pagkasayod sa iyang mga ginikanan, maora ba og nakakita sila og dautang espirito diri nako nga ila naman ipalayo ang akong uyab kanako kay dili mi bagay. Butang nga sakit kaayo dawaton kay nagminahalay mi. Andam ko mopakasal niya sa ilang simbahan ug uyon ra akong mga ginikanan. Apan ang iyang mga ginikanan gusto nga undangon namo among relasyon.
Sa paminaw nimo, angay ba nako undangon o ipaglaban nako akong gugma niya? Nganong ingon ani man ang hunahuna sa ubang mga tawo?
Palihug tambagi ko kay naglibug na ko.
BOBBY
Bobby,
Puno ka sa mga pangutana ug nakalimot ka sa imong gisimbahan nga mao ray makahatag nimo og kahayag sa sitwasyon nimo karon, ang Ginoo.
Pasalamat ka nga lapad ang panghunahuna sa imong mga ginikanan ug labaw na gyud ikaw.
Kon nahigugma nimo ang babaye ug nagsangpit mo sa usa ra ka Diyos, iampo mo kini nga masabtan sa iyang mga ginikanan ang sitwasyon sama sa pagdawat sa imong ginikanan. Sa akong huna-huna ug pangagpas, walay relihiyon nga makaluwas kanatong mga tawo kon kita miyembro nga nahisalaag sa pagsabot sa sugo sa Diyos nga mao ang gugma.
Daghang mga nasud ug klase sa tawo ning kalibutana nga dili gani mga Kristyano apan niasenso ang ilang nasod. Hayahay ang ilang mga tawo unya kita imbes magkahiusa kay sa Kristo ang atong Ginoo, magdinautay naman hinuon (ang uban lang ha?).
Posible dili lang kana ang rason. Basin naa pa ug ang relihiyon lang ang gipasanginlan. Ayaw sad mo pagtaban kay wala sad nay ayo kay walay blessings na sa mga ginikanan. Pag ampo nga ang imong gustong mahitabo sa imong gugma hapsay ang resulta. Believe in God.
Daghang salamat.
PAPA JOE
No comments:
Post a Comment