Tambagi ko Noy Kulas: BF makigbalik

DEAR Noy Kulas,

Tagoa lang ko sa ngan nga Myles, taga Cebu. Minyo ko sa usa ka foreigner mao nga naa na ko diri sa abroad. Dako og gap ang among edad kay ako 30 plus pa lang while siya 60 na kapin.

Kon sex life ang hisgutan, wa koy ikasulti kay bisan sa iyang edad, pang batan-on ang iyang strength. Ingon nila magkatiguwang, magkahinay ang lalake? Ang akong bana wa may slowdown. Kusgan pa kaayo siya.

Di ni ang akong problema karon. Ang akong problem mao ang akong uyab nga akong gibiyaan kay nagminyo lagi ko sa foreigner. Ako siyang gibiyaan kay naghuna-huna ko sa akong future kay kon siya ang akong pamanhon, igo-igo ra namo ang akong income. Naa koy parents ug mga igsuon nga nagkinahanglan og tabang.

Karon kay nagka-chat mi sa FB. Akong nabantayan kay mibalik ang akong love niya.

Mingawon na ko if di mi mag-chat. Gusto lagi siya nga magbalik mi bisan duna koy bana. Amo lang kuno nga isekreto ang among relationship basta kay kami lang.

Unsa may akong buhaton, Noy? Love pa baya nako siya bisan naa na ko sa layo. Galibog ko unsay akong buhaton kay naa na baya koy bana. Lain paminawon, di ba?

MYLES

Myles,

Bitaw maayo kay nakahibawo ka nga di maayo nga inyong balikon ang inyong kagahapon.

Past is past. Nitabok ka na sa taytayan human nimo siya buwagi ug biyai kay nagminyo ka sa foreigner. Bana mo na siya so, ayaw na paghandom niana niya. Bisan tuod naa ka sa abroad ug naa ra siya diri, wa gihapon nay kalainan, naa gihapon moy relasyon minus the sex.

Ayaw pagpinareho anang ubang mga babaye nga maka­takilid lang gani og kadiyot ang bana nga foreigner, lain na ang pahiyuman ug kuptan nga kamot. Mao bitaw nang ubang mga foreigner magmatngon na sa ilang relasyon kay nanagana nga di sila masugamak sa babayeng buluyagon.

Putla nang imong pagsigeg chat niya sa Facebook. Kon di na nimo undangon, masugamak ka sa laing problema. Kon mahibaw-an ka sa imong bana, mokatawa lang kaha na siya? Unya di kaha mauwawan ang imong pamilya kon mahibaw-an sa inyong mga kabanay ug silingan nga nagbalik mo sa imong ex? Think about it. Sa usa nimo ka sayop, daghan ang mangaangin.

Naa na man kay bana, concentrate sa inyong relasyon. Nurture it. Ayaw na pagpangitag lain. Ayaw punita, kan-a ug tunla ang pagkaon nga imo nang giluwa o gisuka. Respetuhi ang imong kaugalingon.

NOY KULAS