Sugilanon: Tungod sa kaymito

“HILAW pa man ni, Day Lucing!” nagkanayon si Alex samtang mipislit sa bunga sa kaymito nga maoy gitudlo sa iyang asawa. Nia siya karon sa itaas sa punoan sa kaymito nga namu­ngingi sa mga bunga. Mikatkat siya bisan supak sa iyang kabubut-on tungod kay nahadlok siya nga makuhaan unya ang iyang asawa. Tulo ka buwan na nga mabdos si Lucing sa una nilang liwat.

“Pangita na lag lain, Dong Alex, kay kakan-unon na kaayo kog kaymito!” ni Lucing nga mihangad kaniya. “Sige ka, di gani ko nimo pakan-on ron, makuha gyud ning akong gisabak!”

Mikapyot si Alex sa laing sanga ug miirog paingon sa itaas pa nga bahin. Gipaliraw niya ang iyang mga mata. Dihang mihangad siya didto mopilit ang iyang panan-aw sa pungpong sa mga bunga nga migilak sa kasinaw kay hinog na. Layo kini sa iyang nahimutangan busa mihinay siyag irog nga nagpanghawid sa sanga aron kab-uiton kini. Apan nabali ang sanga nga iyang gitungtongan ug nasapli ang sanga nga iyang gigunitan.

Diha-diha nahulog si Alex nga nahasangit-sangit sa daghang mga sanga. Misiyagit og kusog si Lucing nga nagpanawag og tabang.

Gidala si Alex sa haduol nga ospital sa ilang dapit ug gipatambalan ang daghang garas ug bun-og nga iyang nahiaguman. Apan ang pinaka grabe mao ang pagkapiang sa tuo niyang tiil.

Sa paglabay sa pipila ka adlaw nakagawas na si Alex sa ospital, apan sementado pa ang tuo niyang tiil. Ginamit ang kratsis mipauli siya sa balay.

Giagak siya ni Lucing.

Pag-abot nila sa ila kalit nahitalunong si Alex. May naalinggatan siya.

“Nganong gipaputol mo man ang mga sa­nga sa kaymito, Day Lucing?” may sambog sa kasuko ang tingog ni Alex dihang iyang nakita nga ang punoan na lang sa kaymito ang nagbarog sa kilid sa ilang balay.

“Akong gipaputol kay nag­lagot ko!” tubag ni Lucing nga nagpangusmo. “Tungod anang kahuya naputos ta karon sa daghang utang ug hapit ka pa gyud mamatay!”

Milingo-lingo si Alex ug nanghupaw. “Di gyud ko gusto nga putlon kanang kaymitoha, Day Lucing, kay naghambin kana og kasugiran sa atong kinabuhi.”

Nahilom si Lucing. Nahunahunaan niya nga tungod sa kaymito nagkaila sila si Alex, nagkahigugmaay ug hangtod nagkaminyuay. Taga Mindanao siya. Nahiabot siya dinhi sa Sugbo dihang nadawat siya sa kompaniya nga iyang giaplayan nga nagbase dinhi. Niaplay siya pinaagi sa Internet.

Didto mopuyo si Lucing sa balay sa iyang paryente nga silingan nilang Alex. Usa kadto ka adlaw samtang naglakaw siya pauli sa iyang gipuy-ang balay, nakita niya si Alex nga namupo sa hinog nga mga bunga sa kaymito. Gisangpit siya ni Alex ug gihatagan. Ug ning higayuna nga mabdos na si Lucing, ang bunga sa kaymito maoy iyang gipangalaan.

Gipikpik ni Alex ang mihuyhoy nga abaga ni Lucing. “Ayaw na lang og hunahunaa ang kaymito, Day Lucing. Buhi pa ang mga gamot busa mosalingsing pa kini ug mamunga iniglabay sa mga bulan. Sama usab sa atong gugma, nga bisan pa sa katalagman nga moabot sa atong kinabuhi, magpabilin gihapon nga lig-on kay nakagamot na kinig maayo sa duha nato ka mga kasingkasing!”

Mitan-aw si Lucing sa nawong ni Alex nga mapahiyumon. Ug nanulod sila sa balay nga malipayon.

(KATAPUSAN)