Tambagi ko Noy Tikyo: Gisaaran og kasal

DEAR Noy Tikyo,

Tawga lang ko sa ngan nga Melia, taga Digos City apan nia nagtrabaho sa Davao.

Duna koy kapuyo nga taga Tagum City. So far sud sa usa ka tuig, maayo ang among panag-uban kay buotan man siya. Duna sab siyay trabaho ug way bisyo.

Hinuon di tanan niyang suweldo mahatag nako kay nagsuporta pa man siya sa iyang ginikanan ug mga igsuon.

Wa ra ni nako kay nakita ko man kaniya nga maayo siya sa iyang pamilya. Ang nakahatag nako og suliran karon kay wala man god siya maghisgut bahin sa among pagpakasal. Na-presyur na man god ko sa akong Mama kay kanunay lang mangutana kon kanus-a kuno mi magpakasal. At least kuno mahiluna na mi sa hingpit isip magtiayon.

Lain nako nga problema, mao ang akong kauban nga lalaki sa work nga nasuod nako pag-ayo. Responsable sab ug buotan. Nanguyab siya nako taliwala sa iyang nasayran nga duna na koy gikapuyo. Iya kong gisaaran og kasal.

Wala nako masayud sa angay nakong buhaton karon. Unsa kahay akong himuon, Noy?

MELIA

*****

Melia,

Sulbara una ang imong suliran bahin sa imong gikapuyo karon inay mangita og lain pang problema. Di puwede nga bisan og wala ka pa maka-exert og effort o makapangita og mga pamaagi sa imong problema, mosud na sab ka og lain nga problema.

Ang pagpangita og laing lalaki di maoy sulbad sa imong problema karon. Gihimo mo lang kining komplikado.

Angay nimong buhaton mao ang pagpakig-istorya sa imong kapuyo. Ayaw iluom ang imong gibati ngadto niya. Aron nga pinaagi niini masayud ka kon ngano.

Nagtuo man god ko nga duna siyay rason nganong hangtud karon wala pa siya makahisgut nimo og kasal. Basin ang rason tungod sa iyang pamilya nga iya pang gitabangan o kaha lain pang mga rason nga tan-aw niya makababag sa inyo unyang pagpakasal.

Aron nga masayud ka sa iyang hunahuna, mas maayo gyud tong magka-istorya mo og maayo bahin niini.

Di puwede nga nag-ipon mo unya duna moy mga isyu sa inyong kaugalingon nga di mahibawo ang usa. Sama na god mo og magtiayon. Kon unsa tong naa nimo, kinahanglan nga naa sab niya. Kon unsa tong imong problema, mao sab ang iyang problema. Kon di mo mag-istorya, unsaon ninyo pagsulbad ang problema? Timan-i kasal lang ang inyong kulang, mahingpit na ang inyong pagka-magtiayon.

Busa bililhon kaayo ning panahona sa inyong kinabuhi ang komunikasyon.

Ayaw sab og pa-pressure sa imong inahan. Take time lang. Kay di baya maayo nga mag-agad ka sa imong inahan. Di baya siya maoy makig-ipon sa imong kapuyo karon, ikaw baya. Busa kon duna may makasulbad sa inyong problema, kamo ra gyung duha sa imong kapuyo.

Ayaw una hunahuna nang edad. Ang kaminyuon wala sab mag-agad sa edad sa tawo, kon di ang iyang kaandam di lang bahin sa pinansiyal apan lakip na sab emosyonal ug espirituwal.

NOY TIKYO