Ako si Neneng, minyo, adunay tulo ka mga anak, taga Davao City. Wala na mi nag-ipon sa akong bana since 2003 kay nag abroad ko. Ten years na ko diri sa Saudi. Sa wa pa ko mag-abroad, akong bana maorag calculator, magsige og kwenta kon pila ang iyang nagasto sa iyang gipakaon namo. Sige ko niyang awayon tungod kay di ko gusto nga mag-away mi.
Di lang ko motubay niya. Pasagdan lang nako siya hangtod nga maghilom na siya
Niadtong 2003 nakalakaw ko. Kaluoy sa Ginuo maayo ang akong mga amo diri. Akong sweldo pirmi ipadala. Gipalayas sa akong bana ang akong anak nga lalake nga edad og 8 years old atong panahuna kay wala magtarong og eskwela. Hangtod karon nawad-an na og deteminasyon sa iyang kinabuhi. 16 years old na siya karon. Wa usab kini niya ilha nga anak sukad gipanganak nako ning bataa. Wa ko kahibawo unsay nakaon sa akong bana nga nakaingon siya nga di niya anak. Di man unta ko salawayon nga pagka babae. Tarong ko nga iyang gipakaslan kay siya lang ang akong uyab.
Akong gibiyaan akong bana adtong 2010 kay wa na ko nakaagwanta sa iyang batasan ug ang mga bata na ang naghangyo nga biyaan ilang amahan sa kapalainom ug manghasi ilaha.
Nagpuyo na ko sa akong sariling balay ug nagpadayon sa pagpanarbaho aron ika-support sa school sa akong duha ka mga babaye nga high school nga mga dalaga na pud. Naay nanguyab nako karon. Okay man sa akong mga anak nga sugton nako basta di lang ko panguwartahan. Ang lalake usa ka police official nga buwag usab sa iyang asawa.
Di sila kasado. Maayo ba kaha akong buhaton nga manguyab ko panahon na sad siguro nga malipay ko kay pulos kasakit ang akong natagamtaman sa akong bana. May balak man gud akong bana nga patyon ko niya kay nawala na siya sa iyang hunahuna tungod sa kapalainom ug barkada. Way trabaho.
Unsay imong ikatambag sa akoa? Angay na ko mangita og kalipay?
NENENG
Neng,
Okay ra man nang desisyon nimo nga mangita ka og laing kalipay. But kinahanglang ipahimutang ug di ka magdali kay basin mahayan ra sab na nimo, sama sa uban nga nakaingon nga dimalas sila sa gugma. Use your head this time.
Una, ilha og maayo nang imong uyab nga police official. Unsa may hinungdan nganong nagkabuwag sila? Bisan kon di siya ang sad-an, unsa may iyang character as a husband?
Di lang kay siya ra ang imong paminawon. Pangita sab og mga tawo nga nakaila niya aron di ka masipyat sa pagpili og lain nga higugmaon. Paminawa usab sila. Husto ang imong mga anak, seguroa nga ang lalakeng pilion nimo, maayo.
Ikaduha, kinahanglan nga ma-annul ang kasal una nimo aron di ka magukod sa imong bana. Basin masulod ka sa problema, di kalipay ang imong maangkon.
Best gyud ang pag-ampo, pagpagiya sa Ginuo sa choice nga imong pagahimuon.
NOY KULAS
No comments:
Post a Comment