Tambagi ko Noy Kulas: Gipuyo sa minyo

DEAR Noy Kulas,

Tawga lang ko sa ngalan Fairy Boat, 21, dalaga, taga dakbayan sa Mactan, Lapu-Lapu City. Nagtrabaho ko diri sa Sugbo.

Ang akong problema kabahin ni sa akong uyab nga minyo. Apan dugay na silang buwag sa iyang asawa ug adunay upat ka mga anak.

Nag-ipon mi sulod sa unom ka mga buwan pa lamang ug kuyog sa duha niya ka mga anak sa usa ka bobong. Ang duha ka gagmay, naa sa iyang asawa. Ang ako lang, gahuna-huna ko sa akong kaugalingon karon kay wa pa ma-annul ang ilang kasal sa iyang asawa. Usahay mag-away mi mahitungod ana kay lagi mahal daw ang magpa-annul. Wa daw siyay ikagasto ug hasulan sa paghikutar sa mga papelis.

Akong namatikdan pud ang iyang mga anak murag wa nakaangay nako kay lagi kirida man ko sa ilang panan-aw mahitungud sa ilang amahan. Ganahan unta ko mobiya niya apan mopatigbabaw ang kaluoy ug gugmang giatay. Kay lagi buotan ug pinangga man ko niya isip nga asawa niya. In love ko niya. Sakitan man ko mawala siya nako.

Unsa may angay nakong buhaton ani kay naglibog na ko? Di man ako ang magpa annul. Wa sad baya kahibawo ang iyang asawa ug ang iyang ginikanan sa among sitwasyon. Mahadlok ko nga ikiha. Manghinaot unta ko nga malamdagan sa imong tambag.

FAIRY BOAT

Fairy Boat,

Bata ka pa kaayo nga nasugba sa ingon niana nga problema. Una, di ka makabasol sa mga anak nianang imong uyab kay duna gyud na silay bias pabor sa ilang mama. Bisan ikaw pa tingali ang naa sa ilang dapit, hayan the same sab ang reaction.

Sakto baya ang imong uyab nga lisod ang annulment sa kasal kay dako og gasto. Mao bitaw na nga dunay magtiayon nga magbuwag nga di na lang magtagad sa annulment sa ilang kasal tungod sa kadako og gasto. Ang akong kauban nga nagpa annul sa kasal migasto og P160 mil. So, di gyud gamay ang gastuhon.

Ang kuyaw nianang inyong sitwasyon kay basin mosumbong nang mga anak nga nagpuyo mo nianang mao nga lalake. Basin ikiha hinuon mong duha kay lig-on ra ba og saksi kay ang duha ka mga bata nga katuohan kaayo sa korte kon pasakaan mo og kaso. Sa kadaghan sa mga lalake, nganong diha pa man gyud ka anang minyo? Dako na nga problema kon maglinabad sa ulo ang iyang asawa.

Unsay maayo nimong buhaton? Pakigsulti sa asawa sa imong uyab. Kon dugay na silang nagbuwag, di tingali na masuko ang asawa. Maora bag mangayo ka og pagtugot niya.

Kana kon isog ka gyud tungod ug alang sa inyong gugma. Unya panggaa og maayo ang mga bata kay mao nay silay yawe alang sa inyong maayong relasyon. Kana kon di ka gyud makagawas sa inyong relasyon.

Pag-ampo usab aron ka malamdagan sa Ginuo kon unsay angay mong buhaton.

NOY KULAS