Tambagi ko Noy Kulas: Nasakpang gikabay-an

DEAR Noy Kulas,

Tawga lang ko sa ngan nga Homie. Kini mahitungod sa akong hinigugmang babae nga akong gika-live in karon ug sa among homeboy.

Dugay na ming nagpuyo aning bayhana. Magpakasal na mi sa sunod nga tuig. Sa wa nako damha, nausab man ang tinagdan sa akong ka live-in diri kanako. Nag sige kog huna-huna kon unsa akong nabuhat nga sayop kaniya o naa ba siyay ka iring-iring. Wa man sad ni siyay trabaho ug naa ra siya permi sa balay kauban sa among homeboy.

Dihang usa ka adlaw dayoff nako ug kaming tulo ang naa sa balay, akong namatikdan nga sweet man kaayo sila og tinagdan sa usag-usa.

Wa ra nako hatagi og malisya kay lagi akong gisaligan ang among homeboy. Usa ka gabii nagsekreto kog uli sa among balay gikan ko nagduwa og basketball. Sa wa nako damha, sa pag-abli nako sa among kwarto, didto nakita nako ang duha nga nag-basketball pud og ilaha.

Nadugmok akong dughan. ug wala na mi nagtingganay sa akong hinigugma. Tambagi ko, Noy Kulas, kon unsay angay nakong buhaton.

HOMIE

Homie,

Lisod ra ba kaayo nang sitwasyon nga imong nasudlan karon, labina kon bag-o pa. Kon ipadayon ninyo karon ang pagpanag-uban, gamay lang nga bikil mag-away na mo. Mas maayo pang mag-estor­ya mong duha. Kon wa na siyay gugma nimo, pasagdai sila inyong katabang nga mag-uban. Mas maayo man gud nang magklarohay kay sa magpabilin mo nga magpuyo unya siya wa nay gugma nimo. Busa at this time, the best thing to do is talk. Aron usab nimo mahibaw-an unsay mga katarungan niya nganong nakaako siya sa pagpanglimbong nimo.

Wa ka ba usab magkuwang kaniya samtang ang inyong helper dako og panahon nga nahatag ngadto kaniya.

Pangutan-a ang imong kaugalingon, uyon ka ba nga ang imong kapuyo karon gihilabtan sa laing lalake ug naabtan pa gyud nimo? Kon magminyo mo, unsa man kahay mahuna-huna mo everytime nga magdug mo or everytime nga wa ka, nga wa kaha siyay laing la­lake?

Nabuhat man gani niya karon, nganong di man niya mabuhat sa umaabot? Ingon ani ra ba gyud ang sagad dagan sa mga panghuna-huna sa mga tawo nga gilimbungan.?

Ikatulo, di kaha ka magsige og huna-huna sa nahitabo sa imong kapuyo everytime nga mag-atubang mo? Kining mga butanga mao unya ang maghimong gubot sa inyong pagpuyo. Wa moy kalinaw.

Busa samtang sayo pa, atubanga ang problema inay inyong likayan. Mas maayo nang mapagawas ang naghuot nga mga pagbati diha sa inyong dughan.

NOY KULAS