Tawga lang ko og Chito, 23, taga Consolacion, Cebu. Ulitawo ko ug 3rd year college pa.
Ang akong problema kay nakapamabdos ko sa wa damha. Nagsugod ang tanan sa birthhday sa akong higala nga si Ben. Nag inom mi sa beach resort hangtod nga naglami ang inom ug nag over night na lang mi. Ni-join mi sa pikas cottage nga grupo sa mga babaye ug didto naila-ila nako si Eroina. Bunga sa ilimnong makahubog, ako siyang napanguyaban.
Sa laktod nga pagka estorya gisugot ko niya kay puro na mi nakainom ug dihang gabhiuna dunay nahitabo namo. Mao ra pud tong higayuna nga dunay nahitabo namo ug wa na pud ko nakigkita niya nga kay duna pud koy tinituod nga uyab nga si Karen nga toa ron sa Hong Kong.
Bulan kapin sa among panaghimamat, ni-text siya nako nga mabdos siya. Ang problema ron kay iyang ipakuha ang bata kon di ko mangasawa niya kay nagpakaulaw daw siya sa iyang mga ginikanan. Unsaon man nako pagpangasawa nga wa pa ko nahuman og eskwela ug wa pud ko mahigugma niya?
Kon akong pahibaw-on ang akong uyab basin magkabuwag mi ilabina misuporta siya sa akong pag-eskwela ug balik. Noy, palihug tambagi ko kon unsay akong angay nga buhaton ni Eroina. Basin og duna siyay dautang plano sa bata. Nakonsensya na ko. Wa na ko kahibawo kon unsa ang akong buhaton. Salamat!
CHITO
Chito,
Kon unsa man gani ang atong buhaton, hubog man kita o di, ato nga atubangon ang consequence. Di kay likayan. Mao nay tinuod nga lalake. Mao bitaw nga sa bisan unsa nga sitwasyon, angay gyud nga atong huna-hunaon og maayo kon duna ba kiniy maayong linugdangan o wa.
Sultihi ang imong pamilya kalabot niini aron matabangan ka ning mao nga problema. Wa may mapugos sa pagpakigminyo kon wa mahigugma.
Busa, naa ra nimo kon magpadala ka sa hulga sa mao nga babaye. Lisod sab tagna-tagnaon kon tinud-on ba niya o di ang iyang bahad.
Makonsensya gyud ka kay imo baya nang binuhatan. Apan sa ako nang giingon nga kinahanglan imong atubangon ang resulta. Ayaw pagtinalawan. Kini usa lang ka hitabo nga molabay lang. Magtudlo kini og leksyon kanimo nga di mo makalimtan. Ang usa ka sayop di diay magbunga og maayong hitabo. Ang nakaayo lang niini kay masuwayan usab dinhi ang gugma ninyo sa imong uyab. Natural ra sab nga masuko siya kay wa bayay babayeng malipay nianang imong gibuhat. Unsa sab kahay imong bation kon ang imong uyab maoy mimabdos tungod kay nakig-sex siya og laing lalake kay siya hubog.
Paminawa unsay desisyon sa imong pamilya. Pakigsultihi ang imong number 2 nga uyab.
Atubanga ang iyang mga ginikanan uban ang imong pamilya. Mas maayo tingali kon ang imong inahan maoy unang makigsulti sa iyang pamilya. Kinahanglan nga makig-atubang ka kay imo man ning tulubagon.
NOY KULAS
No comments:
Post a Comment