Tambagi ko Noy Kulas: Likay-likay na

DEAR Noy Kulas,

Tawga lang ko og Centz You. Ang problema kabahin sa lovelife ug sa akong baby.

Nagsugod ni akong problema sa dihang nagtrabaho ko sa usa ka dakong kompanya diri sa Sugbo. Nakauyab ko and naabot mi og three months.

Sa dihang nag two months na mi, na-discover nako nga mabdos ko and ako siyang gipahibawo. After nako siya giingnan, maora naman mi nga walay klaro. Tagsa na lang siya magparamdam nako and makaingon ko nga wa siyay plano manubag nako kay wa man siya maghisgot og mga plano about sa baby.

Angay pa ba ko nga maghandom ani niya nga moara na man siya nga way gana diri nako ug sa baby? Or ako na lang siya nga buhian and continue living without him? Kay usahay makahuna-huna man ko nga ipakuha na lang nako ang baby pero maluoy man sab ko kay makonsensya ko.

Palihog tambagi ko kay naglibog ko unsay akong buhaton. God bless and more power.

CENTZ YOU

Centz You,

Unahon ta ang imong gisabak. Ayaw paghuna-huna og pakuha sa bata. Naa ka pay sala, pun-an pa nimo. Ang problema di masulbad sa laing problema. Ang laing sala di mahugasan sa laing sala.

Ang kinabuhi gikan sa Ginuo, busa Siya ra ang dunay katungod nga mobawi niini. Way si bisan kinsang tawo ang dunay katungod sa pagkutlo niini kay di sa tawo ang kinabuhi. Busa, kon naa may bata diha sa imong sabakan, ipakatawo kana. Kadaghan sa mga single mother nga malipayong ningbuhi ug ningpangga sa ilang mga anak. Ipakatawo kanang bataa bisan way suporta sa imong hinigugma.

Ayaw pamugos kon di na siya sa imoha. Ang gugma di angay ipamugos. Gikinahanglan kining ihatag, di pangayuon ug di usab ipamugos sa pagdudho ngadto sa gihigugma. Kon naglikay na siya sa iyang kaakuhan karon, kana timailhan nga di gugma ang iyaha diha nimo, kon di biga ra.

That means wa kay kalipay nga makig-uban kaniya kay ikaw ra ang nahigugma. Kay ang gugma sa both sexes kinahanglan nga two-way kay naa diha ang kalipay ug respetuhay sa usag usa. Mag-unsa man ang gugma kon ang usa ra ka kasingkasing ang nagpitik samtang ang lain naa sa lain?

Move on and learn from this lesson. Ayaw na padala sa atik, sa tam-is nga mga pulong gikan sa mga dila nga aplod diay ang laway. Be wise next time. Gamita ang utok, inay ang kasingkasing. Unya ayaw i-surrender ang bandera kon ikaw way kaseguroan. Mao bitaw nga mas maayo kon human na sa kasal ang ihatag ang pagkababaye aron dunay garantiya nga di modagan ang lalake.

Pray and ask for God’s guidance and strength.

NOY KULAS