Tawga lang ko sa ngalan nga Carlo, taga Argao, Cebu. Nahinumdom gyud ko sa panghitabo sa kinabuhi sa akong gugma nga napakyas. Second year college ko dihang nagkauyab mi ni Cyi. Nindot ang among relasyon. Iya kong gidawat bisan ultimo ra ko nga pagkatawo pero di sab bintahaan akong hitsura kay gwapo man ko kay kaliwat man og Katsila akong lolo.
Pero pag-abot namo og 3rd year college napaundang ko kay namatay akong lolo. Dugay ko nakabalik og tungha. Padong na graduate si Cyi. Iya kong gibuwagan kay mag-unsa na lang kuno mi kon magdayon mi nga wa man koy natapos ug nagtrabaho lang ko sa usa ka agrivet sa amo.
Pila ra may istorya, naka trabaho ko sa Mindanao ug kaluoy sa Diyos nakahuman ko og eskwela ug engineer na ko ron. Pagbalik nako sa Cebu last year, nakit-an nako og balik si Cyi nga naa nay anak kay wa diay sila magdayon sa iyang kapuyo. Karon gusto siya
nga magbalik mi.
Angkunon nako nga may pagbati pa ko niya apan dili na siya sama kanindot sa una kay karon bunga sa kalisud nagkagidlay na iyang hitsura. Unsa may buhaton nako? Dawaton ba nako siya o dili? Palihug tambagi ko.
CARLO
Carlo,
Way makapugong nimo kon gusto nimo. Dili ka mag-agad sa mga tawo kay imo man nang pagbati. Apan siguraduha nga madawat nimo siya sa iyang pagkasiya. Ang pagka-usab sa iyang hitsura di man na nimo ikabalaka kay basta may kwarta, mabalik ra man na. Basin gani desperada lang siya mao nga ingon ana siya.
Timbang-timbanga lang kon andam na ka nga makadungog sa istorya sa lain nga salvador del mundo ka gikan sa imong mga ginikanan. Andam ka ba nga ipaglaban nimo siya despite sa iyang kaagi? Sa mga tawo, andam ka ba ipahibawo nila nga mao kini, mao kana? Sa imong kaugalingon, kon andam ba ka nga mahimong amahan sa bata niya.
Kon kini di mo-matter nimo, then padayon kay imo nang kalipay. Mahitabo ang butang tungod dunay rason. Naay mga lalake nga gihimo para mopaanak lang. Naa say gihimo nga mga lalake para mobarog isip amahan. Kana lang. Pag ampo sab. Daghang salamat.
PAPA JOE
No comments:
Post a Comment