Ako si Carl, 18, taga siyudad sa Davao. Nagtrabaho isip waiter sa usa ka kan-anan ning dakbayan.
Ang akong suliran bahin sa akong napamabdosan nga babaye. Silingan ra namo og barangay apan mas maguwa iya nako og duha ka tuig.
Napasubo ra ko niya tungod lagi sa akong barkada nga nagtupo-tupo namo.
Dunay kausa nga nagkauban ming duha sa pagpanguli gikan sa usa ka kalingawan sa downtown area. Wala mi midiretso og uli kay gusto pa niyang mohapit mi sa Rizal Park. Tungod kay sayo pa man, ako siyang gipaundayonan sa iyang gusto. Samtang nanglingkod mi sa park, nagka-holding hands mi nagkadikit ang among lawas. Ambot ba nga miinit man ming duha ug nagkaginaksanay og hugot. Nadala mi sa among gibati niadtong tungura.
Nakahukom ming mosulod og lodge aron nga ipahungaw ang among nagdilaab nga pagbati. Grabe ang among romansa niadtong tungura kay pulos man mi first timer. Napusgay gyud nako ang iyang pagkababaye, Noy, niadtong gabhiona.
Karon ang akong problema kay miburos man siya. Unsaon na lang namo ni kay naglisud man siya og sulti sa iyang ginikanan, ilabi na nga bata pa kuno ko.
Gawas niini, wala sab ko mahigugma niya. Hadlok ko nga makasal sa babaye nga wala nako higugmaa. Palihug lamdagi ang akong hunahuna.
CARL
Carl,
Lisud ning imong nasudlan nga suliran. Nakamabdos ka og babaye nga wala nimo higugmaa.
Nagpadala mo sa inyong mga pagbati nga wala ninyo lantawa ang mamahimong lingtunganay sa inyong gihimo. Mimabdos siya.
Kini maoy problema karon kay wa kay gugma niya. Gawas pa, wala ka sab makahibawo kon duna ba sab siyay love nimo kay di man mo uyab.
Puwede kaayo mong magminyo kay di na man mo mga menor de edad. Apan ang suliran kay ikaw mismo way love niya. Di sab klaro ang iyang pagbati nimo.
Lisud og makigminyo ka nga wa kay gugma. Segurado nga di molahutay ang inyong pagpuyo ug moresulta lang sab sa inyong panabulag.
Useless lang gihapon kon pugson ninyo ang inyong mga kaugalingon nga magminyo kay wa may kasegurohan gihapon.
Hinungdan nga pagpakasal di maoy sulbad sa inyong suliran karon.
Ang inyong buhaton karon mao ang pag-istorya bahin sa inyong sitwasiyon. Sultihi siya nga mas maayong mahibawo ang iyang ginikanan sa iyang gidangatan karon. Naa na man gyud na, busa angay na lang nga atubangon, instead nga tagoan. Kay sa ngadto-ngadto masayran ra man sab na gihapon.
Alang sa imong bahin, kon mahitabong di gyud mo magminyo, angay nga imong suportahan ang bata kay imo man na. Suportahan sab nimo ang babaye samtang magmabdos hangtud nga siya manganak.
Ayaw talikdi ang imong responsabilidad ilabi na gyud ngadto sa bata. Pasabta siya niini aron nga di sab siya ma-depressed og maayo nga makaapekto unya sa bata.
Noy Tikyo
No comments:
Post a Comment