Ako diay si Candy, taga Mindanao ug kasamtangan nga ania sa Sugbo nagtrabaho. 30 anyos na ko karon nga nagtubo nga way mama ug papa. Gibiyaan na lang ko sa akong mama sa akong lola dihang wa na siyay mahimo kay gibiyaan mi sa akong amahan kay nikuyog og lain.
Si mama niadto og Manila para makatrabaho pero natintal sad sa laing nilalang ug nagminyo pag-usab. Apan after four years sa iyang relasyon, namatay kini dihang nanganak. Di kaayo ko kabasol sa akong mama kay si Papa man ang nagbinuang.
Karon nga naglisod na ang akong Lola sa katiguwangon, kalit lang nibutho ang akong amahan ug nangayo siyag pasaylo kanamo. Syempre akong Lola nga iyang mama sayon ang paghatag og pasaylo apan ako maglisod kay wa siya masayod unsa kalisud nga magtubo nga walay mga ginikanan.
Nagdumot gihapon ko niya ug di gani ko ganahan motagad kaniya kay mosurok ang akong dugo niya. Pero daghan ang nagsulti nga angay nako siyang pasayluon kay amahan nako siya. Palihug tambagi ko. Daghang salamat.
CANDY
Candy,
Balaanon gyud, Day, ang pagpasaylo bisan tuod kon sayon ang pagsulti, apan lisod sa nahingtungdan. Apan ang balaang kasulatan nag-promote sa pagpasaylo. Tawo ra ang imong amahan ug siguro bata pa o immature ang iyang hunahuna niadtong higayona. Bisan pa si mama nimo, kon asa man to karon, pareha ra sila ni papa nimo nga di responsable pagka-ginikanan. Hayan problemado na ang ilang relasyon o basin wa mahigugma si papa nimo sa sinugdanan. Mao nga ayaw sunda kon may pamilya na ka.
Pasaylo-a ang imong amahan. Mas maayo nga wa tay bug-at sa atong kasingkasing. Usa pa, wa ka moabot niining kalibutana kon wala sila. Ang kakuwang sa kinabuhi di na mawala.
Daghan man gani nga mga nakaginikanan og mga way ayo nga gusto unta nga nahitabo ngadto kanila ang nahitabo nimo. Meaning? Still you have the privilege kay buhi ka nga naka experience isip tawo. Ang uban diha mao pay paglugwa, patay na. Pag-ampo sa Ginuo nga humukon niya ang imong kasingkasing. Daghang salamat.
PAPA JOE
No comments:
Post a Comment