Tambagi ko Noy Tikyo: Dili mohatag ug sustento

DEAR Noy Tikyo,

AKO si Patricia, minyo na. Duna mi usa ka anak. Apan human sa lima ka tuig nagkabulag mi.

Wa sab magdugay, nakakaplag ko og laing lalaki nga nahimo kong boyfriend. Nagpuyo mi ug nakabaton og duha ka buok anak.

Apan ang iyang inahan supak sa among kahimtang busa nagkabuwag gihapon. Silingan ra namo og sityo sa barangay ang lalaki busa di malikayan nga usahay makahimamat gihapon mi.

Ang akong anak sa akong bana kaniadto tua sa akong ginikanan sa Cebu. Samtang ang among anak sa akong kapuyo nia nako.

Tungod kay naglisud ko og buhi nila kay tindahan ra man ang akong panginabuhi, mihangyo ko sa akong kapuyo nga suportahan ug sustentohan sila. Apan nagmagahi siya sa pagsuporta nila kay duna na kuno siyay kaugalingong pamilya.

Unsa may akong buhaton aron nga mapugos siyang himuon ang iyanbg responsabilidad sa duha niya ka anak nga nia nako? Arang-arang baya ang iyang kahimtang kay gawas nga duna siyay nindot nga trabaho, nakaasawa pod siya og adunahan. Salamat daan sa imong tubag, Noy.

Patricia

*****

Patricia,

Wa kay angay nga ikabalaka bahin niini gumikan kay nalatid man kini sa balaod. Bisan tuod kon buwag na kamo nianang imong kapuyo kaniadto, mapugos siyang suportahan ang duha ninyo ka mga anak kay siya man gyud ang amahan niini.

Apan kinahanglan nga molihok ka sab ug di magpadala sa iyang mga alibi nga di niya kaya ang pagsuporta nila. Kay base sa imong pagsaysay, dunay kapabilidad ang lalaki nga masuportahan ang duha niya ka mga anak gumikan kay maayo man siya og kahimtang.

Busa barugi ang katungod sa mga bata aron nga maangkon nila ang suporta nga angay alang kanila. Una nimong buhaton mao ang pagduol sa inyong barangay aron nga ipatawag ang imong kapuyo ug hisgutan ang imong tinguha nga sustento alang sa mga bata.

I-settle kini sa barangay pinaagi sa inyong kapitan, apan kon di mahilot sa barangay level, mo-isyu ang kapitan og sertipikasyon aron nga didto na kamo sa korte maghusay aron nga maseguro nga makuha mo ang sustento nga imong gipangita alang sa mga bata.

Kon wala ka masayud kon unsaon kini pagbuhat, duola ang bisan kinsang opisyal sa inyong barangay aron nga magiyahan ka sa angay nimong pagabuhaton. Sila na unya ang mahibawo kon unsay sunod nimong himuon.

Hinaut nga molampos ka sa imong tinguha kay alang man kini sa kaayohan sa imong mga anak.

Noy Tikyo