Ang akong suliran kabahin ni sa among silingan nga minyo apan maorag dalaga. Magsige siya og laag kay makigkita sa iyang kabit. Wa siyay pagtagad sa iyang duha ka mga anak, usa nila nakasakop na niya apan wa siya mauwaw. Ang iya sab nga bana ingon sa way pagtagad ani niya kay mahadlok kon iyang pakit-on nga isog siya. Ander kaayo niya.
Kanunay ni siyang makakita og away sa mga silingan unya manghulga dayon nga ipabarang.
Maorag duna siyay gisaligan. Iyang giabusohan ang iyang bana ug mga anak. Duna ba siyay tulubagon sa balaud?
NENA
Nen,
Taas kaayo ang imong suwat apan ang kinatibuk-ang bahin ma-summarize lang og mubo.
Concerned ka sa kinabuhi sa imong silingan sama sa uban nga magsige og pamantay. Don’t get me wrong, but ang usag usa nato lainlain og kinabuhi. Kon unsay gibuhat nimo, way labot ang uban. Mao sab ikaw, way labot sa unsa may kinabuhi sa uban.
Ang iyang mga anak, kon wa makatungha, responsibilidad na kana sa mga ginikanan. As long as wa gikulata sa mga ginikanan ang mga bata, wa silay tulubagon. Kon di ganahan ang anak nga motungha, di mapugos ang bata sa pag-adto sa tunghaan.
Kon duna nay mas angay ma-concern, ang pamilya sa bana maoy mas dunay katungod kay kanimo nga silingan lang. Kon nagpa-ander ang bana, iya na sab na, wa ka nay labot niana. Kon tinuod nga nakigrelasyon nang bayhana, problema na kana sa bana. Kon way trabaho nang bayhana, ila na kana sa pamilya. In short, kita angay nga mag-atiman sa atong kaugalingong problema, di sa uban.
Kon palaaway na siya sa mga silingan, ireklamo sa barangay aron mapitol o mabadlong kana siya. Naay tawo nga lisod sabton ang batasan. Ang labing maayong mabuhat ninyo niana mao ang paglikay na niana niya. Kon dunay tighatod og estorya ana niya, likayi ninyo nang tawhana aron di moulbo ang kagubot.
Ayaw na pagtagad sa imong silingan kon unsa may ilang gibuhat. Ila na kana nga problema, di imoha.
NOY KULAS
No comments:
Post a Comment